Товарищ Фархат

رد اللواء أسعد عبود وهو يضحك - ما تزودهاش بقى! النهارده سماح عشان عم موريس الله يرحمه بس ما تبسطهاش أكتر من كده! فضحكوا. - ما انت لو اعتقلتني والله العظيم ها يبقى أحسن من القرف اللى احنا فيه ده! فسارع معتز خميس الشهير في وسط البلد بزكي قِدرة بالقول - آه والله الواحد بقى حاسس إنه عايش في فيلم الطيور بتاع هتشكوك! فقال شفيق بدوي الشهير في وسط البلد بمسيلمة الكدَّاب - مصر بقت ناجازاكي! هيروشيما وناجازاكي! فضحك كل من سمع الوصف بالصالة. قال خالد سرحان الشهير في وسط البلد بخارب ندمان، والذي كان يجالسنا في حلقتنا المتحلقة حول أحمد فرحات الشهير في وسط البلد بزوربا - صحيح والله! مصر فعلاً بقت ناجازاكي! فقال أحمد فرحات الشهير في وسط البلد بزوربا - ما هي دي نتيجة إن الدولة تشيل إيديها من المجتمع! دي نتيجة إن الحكومة تتصرف وكأنها شركة! المجتمع يتحول من مجتمع إلى سوق! ويبقى أصحاب السوق بقى! السوء بالهمزة.